MUQDISHO:-Iyadoo saakay ilaa iyo galabta ay ka socdeen waqooyiga magaalada Muqdisho gaar ahaan degmooyinka Shibis iyo C/casiis dagaalo ayaa waxa galabta duqeymo culus loo geystay xaafado ka mid ah degmada Yaaqshiid ee magaalada Muqdisho.

Qasaaraha dagaalka ma aheyn mid ku badnaa dadka rayidka ahaa laakin shacabka waxaa saameeyey madaafiic ay ciidamada dowlada iyo kuwa AMISOM ay galabta ku garaaceen xaafado ka mid ah degmada Yaaqshiid.

Inta la ogyahay 15 ruux ayaa ku geeriyootay 65 kalana dhaawacyo ayaa kasoo gaaray dduqeymo ba,an oo ay AMISOM iyo ciidamada dowlada u geysteen xaafadaha,Suuq bacaad,Towfiiq iyo Juungale ee degmada Yaaqshiid.

Goobaha ugu daran ee lagu dhamaaday waxaa ka mid ah xaafada Juungale oo ay hal meel ku wada dhinteen 5 ruux marki uu madfac ku habsaday dukaan ay ku jireen.

Suuqa lagu magaacabo Suuq Bacaad ayaa isna gaari BL ah waxa ku hordhacay madfac hoobiye ah iyadoo ay ku dhinteen halkaasi 7 ruux isla markaana ay ku dhaawacmeen 11 kale sida ay xaqiijiyeen dad goob joogayaal ah.

Mashaqadaasi ayaa ka dhacday agagaarka xarunta Shirkada Qaran ee Suuq Bacaad waxaana dadki halkaasi ku sugnaa ay ka amakaageen sida ay wax u dahceen.

Sidoo kale goobaha galabta la duqeeyey ayaa waxaa ka mid ah degmada Kaaraan halkaas o la sheegay in ay ku dhinteen afar ruux,xaafada Arjintiin ayaa la sheegay in ay ugu darneyd meelaha la duqeeyey.

Dhinaca kale ciidamada AMISOM ayaa ku biiray galabta dagaalka Waqooyiga Muqdisho iyadoo ciidamada dowlada ay dib u qabsadeen agagaarka Hotel Global oo ay saakay ka qabsadeen xoogaga mucaaradka.

Waxaa caawa degan xaalada goobihi ay dagaalada ka dhaceen maanta ee Waqooyiga magaalada Muqdisho.
 

Soomaalidamaanta
Muqdisho.